“Tirana nuk mund të jetë jetime”, Rama kërkon lirimin e Veliajt: Procesi penal në gjendje të lirë

Edi Rama mblodhi në studion e tij mediatike, në Kryeministri, pesë socialistët që garojnë për Beratin, Vlorën, Tepelenën, Cërrikun dhe Matin, por mendjen e kishte te kandidatja e gjashtë që nuk ishte në studio, Ogerta Manastirliu, shkruan A2 CNN.

Vendimin e Gjykatës Kushtetuese, që hodhi poshtë përfundimisht mundësinë e zgjedhjeve të parakohshme në Tiranë, duket se nuk e kishte tejkaluar ende, duke e komentuar këtë herë me zë e figurë.

“Nëse Tirana nuk do të ketë zgjedhje deri në 2027 dhe Kushtetuesja mendon se kryebashkiaku i Tiranës nuk mund të largohet, përveçse me zgjedhje, atëherë jemi përballë një disproporcioni të dyfishtë. Kush ka në dorë ndihmojë në zgjidhjen e këtij ngërçi absurd, duhet të kujtohet se, përtej të gjitha teorive të tjera të konspiracionit, kryeqyteti nuk mund të trajtohet si jetim për vite me radhë. Ky është një skandal në vetvete dhe është një skandal për të cilin qytetarët e Tiranës paguajnë një kosto, dhe kryeqyteti paguan një kosto çdo ditë, të padrejtë”, tha Rama.

Komentet ndaj vendimit të Gjykatës i çoi edhe më tej, duke thyer zotimin e tij se akte të tilla nuk i komenton. Me deduksion logjik, ai shprehu qëndrimin se tanimë, Kushtetuesja duket të nxjerrë Veliajn nga qelia dhe ta ridërgojë në zyrën e kryetarit të Bashkisë së Tiranës.

“Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë, por ama në dëm të madh të Tiranës, por sheh një qëndrim të vendosur parimor, nuk ka se si të mos presë që, me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë për të vijuar procesin gjyqësor në gjendje të lirë, apo jo? Më duket se edhe kjo është gjëja më normale!”, tha Rama.

Erion Veliaj nga ana e tij vijon të jetë kryetar i Bashkisë së Tiranës nga qelia e paraburgimit në Durrës, ku shkoi ta vizitonte edhe një grup nga institucioni i Avokatit të Popullit, kryesuar nga Erinda Ballanca, lidhur me kushtet e trajtimit të tij.