Presidentja e Kosovës, Vjosa Osmani ka pritur në takim sot të Ngarkuarën me punë të ShBA-së, Anu Prattipati. Presidenca njofton se Osmani ka diskutuar me Prattipatin rreth vizitës së saj të fundit që ka pasur në ShBA, poashtu dhe për zhvillimet e fundit në vend.
Osmani shprehu mirënjohje për ftesën e presidentit amerikan Donald Trump që Kosova të jetë shtet bashkëthemelues i Bordit të Paqes, si dhe për garancat për paqe dhe stabilitet në rajon.
Ajo ka biseduar me të edhe për takimin që ka pasur në ShBA me Sekretarin e Shtetit, Marco Rubio, ku i theksoi Prattipatit rëndësinë e pranisë ushtarake amerikane dhe aleatëve në kuadër të NATO-s si faktor kyç për stabilitetin.
“Presidentja Osmani shprehu edhe njëherë mirënjohje për ftesën e Presidentit amerikan, Donald Trump, që Kosova të jetë shtet bashkëthemelues i Bordit të Paqes, si dhe për garancat e dhëna për paqen dhe stabilitetin në rajon, duke rikonfirmuar përkushtimin e Kosovës për angazhim dhe kontribut të vazhdueshëm”.
“Ajo veçoi po ashtu çështjet e diskutuara në takimin me Sekretarin e Shtetit, Marco Rubio, duke theksuar diskutimet e fokusuara në avancimin e partneritetit strategjik Kosovë–SHBA, me theks në sigurinë rajonale, diplomacinë, ekonominë dhe mbrojtjen. Presidentja ritheksoi rëndësinë e pranisë ushtarake amerikane dhe të aleatëve në kuadër të NATO-s si faktor kyç për stabilitetin, si dhe theksoi se anëtarësimi i Kosovës në NATO mbetet objektiv strategjik për paqe afatgjatë”, thuhet në njoftimin e Presidencës.
“Me këtë rast, Presidentja Osmani nënvizoi sërish rëndësinë e vijimit të dialogut strategjik bilateral, duke theksuar se partneriteti me SHBA-të është interes jetik dhe ekzistencial për Republikën e Kosovës.
Gjatë takimit u diskutua edhe për zhvillimet e fundit politike në vend, me theks në rëndësinë e përmbylljes së proceseve kushtetuese dhe konsolidimit të plotë institucional, në funksion të stabilitetit demokratik, zhvillimit të vendit dhe adresimit të nevojave të qytetarëve.
Duke folur për zhvillimet e fundit në vend, Presidentja Osmani vuri në pah edhe përmirësimet e dukshme në fushën e sigurisë dhe sundimit të ligjit në veri të vendit, të reflektuara në raportet e fundit të Policisë së Kosovës për rendin dhe ligjin gjatë vitit 2025. Sipas këtyre të dhënave, konfirmohet një situatë dukshëm më e qetë dhe më e sigurt për të gjithë qytetarët në atë pjesë të vendit”, thuhet tutje në njoftim.
