Shefi i Grupit Parlamentar të PDK-së, Arian Tahiri, ka deklaruar se Hashim Thaçi duhet të rikthehet në postin e Presidentit të Kosovës pas përfundimit të procesit gjyqësor ndaj tij.
Tahiri, përmes një postimi në Facebook, ka thënë se deklarimi i tij i një dite më parë, se Thaçi është presidenti që i duhet Kosovës, ka marrë mbështetje edhe nga ish-kryeministri Ramush Haradinaj.
“Deklarimi im i djeshëm, si shef i Grupit Parlamentar të PDK-së, se Hashim Thaçi është Presidenti që i duhet Kosovës, sot mori mbështetje të rëndësishme politike edhe nga ish-kryeministri Ramush Haradinaj”, ka shkruar Tahiri.
Ai ka theksuar se menjëherë pas përfundimit të procesit më 16 shtator, Thaçi duhet të rikthehet në Zyrën e Presidentit.
