Sot u suspenduan 11 policë, por a e dini çfarë kishte ndodhur me ata që u suspenduan pas vrasjes së Hamide Magashit?

Suspendimi i 11 zyrtarëve policorë pas vrasjes së Arlinda Zekajt rikthen në vëmendje një rast të ngjashëmm, atë të Hamide Magashit.

Edhe pas vrasjes së Magashit, në nëntor të vitit 2022, Inspektorati Policor i Kosovës kishte rekomanduar suspendimin e katër zyrtarëve policorë në Lipjan.

Megjithatë, të katër policët ishin kthyer në vendet e tyre të punës gjatë vitit 2023, siç kishte raportuar atëherë “Betimi për Drejtësi”.

Ata ishin suspenduar me pagesë, nën dyshimet për kryerjen e veprës penale të keqpërdorimit të pozitës apo autoritetit zyrtar.

IPK-ja kishte dorëzuar kallëzim penal ndaj tre zyrtarëve, përkatësisht një rreshteri dhe dy hetuesve të Stacionit Policor në Lipjan.

Ndërkaq, ndaj komandantit të stacionit ishte kërkuar inicimi i procedurës disiplinore brenda Policisë së Kosovës.

Pas përfundimit të hetimeve, IPK-ja kishte njoftuar drejtorin e përgjithshëm të Policisë se shkaqet e suspendimit të katër policëve kishin pushuar.

Hamide Magashi ishte vrarë më 30 nëntor 2022 nga bashkëshorti i saj, në oborrin e Klinikës së Gjinekologjisë në QKUK.

Tani, më 29 tetor 2026, Policia ka suspenduar 11 zyrtarë, përfshirë drejtues të lartë policorë në Pejë, pas vrasjes së Arlinda Zekajt.

Sipas Policisë, suspendimet janë rekomanduar nga IPK-ja, e cila po heton veprimet dhe mosveprimet e zyrtarëve gjatë trajtimit të rastit.

Zekaj u vra më 25 tetor në Vitomiricë të Pejës, pasi më parë kishte kërkuar mbrojtje nga institucionet