Si u zbulua përmes “SKY ECC” rrjeti kriminal me bazë në Kosovë – Europoli jep detaje

EUROPOL ka dhënë detaje rreth aksionit të fundit të zhvilluar në Kosovë, ku është goditur një rrjet i krimit të organizuar i përfshirë në trafikim të drogës në shkallë të gjerë, përdorim të dokumenteve të identitetit të rreme, posedim të paligjshëm të armëve dhe pastrim parash në disa vende të Evropës.

Sipas EUROPOL-it, rrjeti është zbuluar përmes mesazheve të shkëmbyera nga anëtarët e tij në platformën e komunikimit të koduar SKY ECC.

Tutje bëhet e ditur se rrjeti i krimit të organizuar me bazë në Kosovë ishte nën hetim për tre vjet, ndërsa hetimi ka kulmuar më 9 qershor, kur Policia e Kosovës ka arrestuar pesë (5) anëtarë kryesorë të organizatës kriminale, të cilët dyshohet se qëndronin pas një perandorie kriminale me vlerë rreth 80 milionë euro.

Në aksion kanë marrë pjesë 150 oficerë policorë, të mbështetur nga një ekspert i EUROPOL-it.

Grupi kriminal, sipas EUROPOL-it, ka përdorur platforma të koduara komunikimi për të koordinuar aktivitetet e trafikimit të drogës në disa shtete evropiane, ndërsa qendra e tij operative ka qenë në Kosovë.

Nga Kosova, anëtarët e lartë kanë drejtuar aktivitetet kriminale, kanë koordinuar dërgesat ndërkombëtare të drogës dhe kanë menaxhuar pastrimin e parave të fituara në mënyrë të paligjshme.

EUROPOL po ashtu bën të ditur se gjatë tre viteve të fundit, që nga nisja e hetimit:

42 të dyshuar janë hetuar; 76 lokale janë kontrolluar; janë sekuestruar asete kriminale me vlerë rreth 80 milionë euro.

Operacioni është pjesë e një projekti të strukturuar operativ në kuadër të OTF LIMIT, që ka bashkuar autoritetet e zbatimit të ligjit nga Belgjika, Franca, Kosova dhe Holanda, me mbështetjen e EUROPOL-it.