Udhëtarët e linjës Beograd – Tiranë, mbetën të bllokuar në aeroportin “Nikola Tesla” në kryeqytetin e Serbisë. Ngjarja sipas gazetarit Blendi Fevziu, ndodhi pasditen e së martës.
Ai ka publikuar pamjet tmerruese që i ka pranuar nga njëri prej udhëtarëve shqiptarë që duhej të ishte pjesë e këtij fluturimi. Sipas tij, shqiptarët mbetën të bllokuar në autobusin që bartë pasagjerët në pistë deri të aeroplani.
Për shkak të temperaturave të larta dhe mungesës së kondicionerit në autobus, udhëtarët shqiptarë janë gjetur në vështirësi, transmeton Klankosova.tv.
Në “Kosova Today”, Lola Toromani tregoi rrëfimin e ngjashëm që i ndodhi në vitin 2002, po në Aeroportin e Beogradit.
“Ne kemi ikur në Belgjikë, në vitin 1999 dhe kur u kthyem në Shqipëri, sepse fëmijët ishin shumë të shqetësuar dhe me shumë vështirësi u adaptuan në shtetin perdëdimor, dhe në momentin që do të ktheheshim pasi bëmë pasaportat shqiptare të reja, dhe u nisëm në shtator të 2002-shit në vendin ku kishim emigruar. Gjetëm një autobus Tiranë-Beograd, vetëm ai ishte, sepse në atë kohë nuk kishte avione direkte siç ka sot. Në Tiranë kaluam pa problem, sepse ishim me kartat e bardha dhe gjithçka në rregull, vajzat i kisha 9 dhe 11 vjeç. Kur kaluam në Beograd, sapo më pa mua ma mori kartën dhe kolegu ia pasoi atë shefit të tij. Mua më kaluan të rrënqethura në trup, nuk e di një parandjenjë ndoshta, dhe më tha kaloni këtej juve e pastaj vazhdoi me personat e tjerë”, tha fillimisht Toromani.