Sipas informacioneve paraprake, i dëmtuari është goditur me tytën e një pistolete zhurmuese dhe është transportuar me urgjencë drejt Spitalit Rajonal të Lezhës, ku po merr ndihmën mjekësore, shkruan vizionplus.tv .
Burime bëjnë me dije se ai ndodhet jashtë rrezikut për jetën.
Pas ngjarjes, policia ka shoqëruar një person, ndërsa vijojnë veprimet hetimore për zbardhjen e plotë të rrethanave të konfliktit. Në vendin e ngjarjes është gjetur edhe pistoleta zhurmuese, e cila dyshohet se është përdorur gjatë konfliktit.
“Rreth orës 21:30, në zonën e lodrave, në Shëngjin, gjatë një konflikti me sende të forta mes dy shtetasve, ka mbetur i dëmtuar shtetasi M. P., i cili është transportuar në Spitalin Rajonal Lezhë dhe ndodhet jashtë rrezikut për jetën.
Menjëherë pas marrjes së njoftimit, shërbimet e Policisë kanë shkuar në vendngjarje, ku kanë bërë të mundur shoqërimin e autorit të dyshuar, shtetasit A. Ll. Gjatë veprimeve të para hetimore është gjetur dhe sekuestruar, në cilësinë e provës materiale, një armë sportive zhurmuese, e cila dyshohet se mbahej prej tij.
Grupi hetimor ndodhet në vendngjarje dhe, nën drejtimin e Prokurorisë, po kryen veprimet procedurale për sqarimin e plotë dhe dokumentimin ligjor të rrethanave të ngjarjes”, njofton policia.
