Administrata amerikane pritet ta intensifikojë trysninë ekonomike ndaj Iranit përmes sanksioneve të reja, të cilat mund të vendosen çdo javë.
Sekretari amerikan i Thesarit, Scott Bessent, deklaroi se Uashingtoni do të marrë në shënjestër institucionet dhe kompanitë që vazhdojnë të kenë marrëdhënie financiare me Iranin.
“Do të shihni shumë më tepër nga kjo çdo javë”, tha Bessent në një intervistë për Reuters, para mbledhjes së ministrave të Financave të G20-s.
Paralajmërimi vjen pasi Shtetet e Bashkuara vendosën sanksione ndaj degëve të Banque Misr në Emiratet e Bashkuara Arabe, për shkak të lidhjeve të dyshuara financiare me Iranin.
Sipas Bessentit, masat mund të përfshijnë edhe përjashtimin e plotë të institucioneve të caktuara nga sistemi financiar i bazuar në dollarin amerikan.
Ai bëri të ditur se SHBA-ja do t’u kërkojë ministrave të Financave dhe guvernatorëve të bankave qendrore të vendeve të G20-s t’i ndërpresin marrëdhëniet ekonomike me Iranin. Në të kundërtën, institucionet mund të përballen me sanksione dytësore.
“Jeni ose me ne, ose me iranianët”, deklaroi sekretari amerikan i Thesarit.
Bessent tha se synimi i masave është të pengohet përdorimi i sistemit financiar ndërkombëtar për financimin e regjimit iranian. Ai hodhi poshtë pretendimet se sanksionet nuk do të jenë efektive pa ndëshkimin e kompanive kineze që blejnë naftë nga Irani.
Sipas tij, pjesa më e madhe e këtyre blerjeve tashmë është kufizuar përmes masave amerikane ndaj porteve iraniane, ndërsa po zvogëlohet edhe sasia e naftës së grumbulluar në cisterna.
“Problemi është zgjidhur”, u shpreh Bessent, duke pretenduar se presioni ekonomik i Uashingtonit po jep rezultate.
