Sadiku: Nesër është një nga momentet e fundit të mbrojtjes së këtij shteti nga kapja e plotë

Deputeti i Lidhjes Demokratike të Kosovës (LDK), Ermal Sadiku, ka reaguar në prag të votimit për dy gjyqtarë të Gjykatës Kushtetuese të Kosovës, duke e konsideruar këtë proces si një moment vendimtar për të ardhmen e shtetit.

Sadiku përmes një postimi në rrjetin social Facebook ka thënë se Gjykata Kushtetuese ende mbetet një nga institucionet që ende nuk është kapur nga ndikimi partiak i Lëvizjes Vetëvendosje.

“Një nga institucionet e fundit që ende nuk është kapur plotësisht nga njerëzit partiakë të partisë vetëvendosje është Gjykata Kushtetuese. Gjatë këtyre 6 viteve, ata kanë arritur të instalojnë njerëzit e tyre, kryesisht me libreza partie, në ndërmarrje publike, institucione, borde dhe struktura shtetërore te cilat do duhet të ishin te pavarura dhe profesionale. Nesër është një nga momentet e fundit të mbrojtjes së këtij shteti nga kapja e plotë, nga vendimet e një personi dhe një partie”, ka shkruar ai.

Deputeti e ka vlerësuar se votimi i nesërm në Kuvendin e Kosovës nuk ka të bëjë vetëm me emra, por për themelet e shtetit.

“Nesër në Kuvendin e Kosovës votohet për dy gjyqtarë të Kushtetueses. Nuk votohet vetëm për disa emra. Nesër votohet për vetë shtyllën e shtetit tonë, për drejtësinë, për Kushtetutën, për të ardhmen e Republikës së Kosovës. Në mbrojtje të shtetit”, ka shkruar Sadiku.