Ramadani denoncon përzgjedhjen për Bordin e ZRRE-së: Qeveria nuk përzgjodhi kandidatët më të mirë, më të pikëzuarit mbetën jashtë

Deputeti i Aleancës, Burim Ramadani, ka ngritur shqetësime lidhur me mënyrën se si Qeveria ka përzgjedhur kandidatët për anëtarë të Bordit të Zyrës së Rregullatorit për Energji (ZRRE).

Ramadani thotë se ndonëse procesi i konkursit ka përfshirë vlerësimin dhe renditjen e kandidatëve sipas pikëve të fituara, Qeveria nuk ka propozuar kandidatët me rezultatet më të larta.

Sipas tij, konkursi për anëtarë të ZRRE-së është shpallur më 28 prill 2026 nga Ministria e Zhvillimit Ekonomik, ndërsa më 10 korrik është themeluar Komisioni Rekomandues ad hoc.

Ai thekson se më 17 dhe 18 gusht, Komisioni ka renditur kandidatët sipas pikëve të fituara në intervistë.

“Por, më të mirët në poentim nuk propozohen për Bordin e ZRRE-së, por më të dobëtit”, ka deklaruar Ramadani.

Sipas tij, kandidatët e renditur në vendin e parë, të tretë, të katërt, të gjashtë dhe të shtatë nuk janë propozuar nga Qeveria, ndërsa janë propozuar kandidatët e renditur në vendet e dyta, të pesta, të teta dhe të nënta.

Ramadani e ka cilësuar këtë si shkelje të meritokracisë, duke ngritur pikëpyetje mbi vlerën e vetë procesit të konkursit.

“Kjo i bie që konkursi nuk ka vlerë në këtë pushtet. Meritokracia është shkelur brutalisht!”, ka shkruar ai