Radomir Laban kishte kërkuar përjashtimin nga vendimmarrja, kërkesa iu refuzua nga Kushtetuesja

Gjykata Kushtetuese e Kosovës në publikimin e aktgjykimit të plotë për çështjen e konstituimit të Kuvendit, ka njoftuar se gjyqtari Radomir Laban kishte kërkuar përjashtimin e tij nga vendimarrja, por që i është refuzuar.

Kjo kërkesë e tij kishte ardhur dy ditë pas konferencës së Presidentes Vjosa Osmani, të martën e 5 gushtit, ku dhe kishte tërhequr kërkesën e saj drejtuar Kushtetueses.

“Më 7 gusht 2025, gjyqtari Radomir Laban kërkoi përjashtimin e tij nga vendimmarrja nga rastet KO193/25 dhe KO196/25 si dhe KO215/25. Të njëjtën ditë, Gjykata njëzëri, refuzoi kërkesën për përjashtim të gjyqtarit Radomir Laban”, thuhet në aktgjykimin e Kushtetueses.

Në konferencën e 5 gushtit, Osmani deklaroi se kishte tërhequr kërkesën drejtuar në korrik Gjykatës Kushtetuese për të kërkuar sqarim se çfarë do të ndodhte nëse Kuvendi i Kosovës nuk do të konstituohej deri më 26 korrik – afati i përcaktuar nga gjykata më herët përmes një aktgjykimi.

Ajo pati thënë se arsyeja e tërheqjes së kërkesës së saj është gjyqtari serb në Gjykatën Kushtetuese, Radomir Laban.

Osmani kishte thënë se caktimi i Llabanit si raportues në shqyrtimin e kërkesës së saj, “është jo vetëm shqetësues, por edhe i rrezikshëm”.