Qendra Klinike dhe Universitare e Kosovës ka bërë të ditur se në Klinikën e Otorinolaringologjisë është realizuar me sukses intervenimi kirurgjik i veshit për kthimin e dëgjimit, te një paciente e cila sipas QKUK-së, për 18 vjet ishte përballur me humbje të rëndë të dëgjimit dhe vështirësi të mëdha në komunikim.
“Pacientja kishte kërkuar trajtim në qendra të ndryshme shëndetësore brenda dhe jashtë vendit, pa arritur përmirësimin e dëshiruar. Pas vlerësimeve të detajuara klinike, ekzaminimeve diagnostike dhe analizës multidisiplinare të rastit, ajo iu nënshtrua me sukses ndërhyrjes kirurgjikale në Klinikën e Otorinolaringologjisë”, thuhet në njoftimin e institucionit.