Qeveria në detyrë merr gjashtë vendime të reja

Një nga vendimet kryesore ishte ndarja e 580 mijë eurove për bashkëfinancimin e projektit për ndërtimin e Shkollës së Muzikës dhe Muzeut të Preshevës.

Kjo mbështetje vjen në vazhdën e angazhimit institucional për shqiptarët në Luginën e Preshevës, duke pasuar një vendim të mëhershëm për ndarjen e 626,400 eurove për arsimin dhe lobimin institucional në Preshevë, Medvegjë dhe Bujanoc, që përfshin bursa për studentë dhe aktivitete avokuese në nivel ndërkombëtar.

Në kuadër të Pakos së Ringjalljes Ekonomike, Qeveria ndau 2 milionë euro për punësimin e qytetarëve të komuniteteve joshumicë në të gjithë vendin. Kjo mbështetje është pjesë e Masës 1.9 dhe synon integrimin ekonomik të këtyre komuniteteve.

Një tjetër vendim me rëndësi ishte miratimi i nismës për lidhjen e Marrëveshjes së Grantit me Asociacionin Ndërkombëtar për Zhvillim. Marrëveshja ka për qëllim zhvillimin e një kornize rregullatore kombëtare për sigurinë e digave në Kosovë.

Vlera e grantit është 1 milion dollarë dhe do të shërbejë për asistencë teknike në përputhje me standardet ndërkombëtare.

Gjithashtu, Qeveria vendosi rialokimin e 1.2 milionë eurove për 10 projekte kapitale në 10 komuna: Dragash, Ferizaj, Gjakovë, Han i Elezit, Klinë, Mitrovicë, Podujevë, Shtime, Prizren dhe Mamushë.

Këto projekte synojnë të mbështesin zhvillimin lokal dhe përmirësimin e infrastrukturës në këto zona.

Vendimet e sotme u prezantuan si dëshmi e vazhdimësisë së punës institucionale dhe përkushtimit për përfshirje të barabartë të të gjithë qytetarëve të Kosovës.