Profesori amerikan pas vrasjes së Arlinda Zekajt: E turpshme që gratë në Kosovë ende vriten në shtëpitë e tyre

Profesori amerikan Alon Ben-Meir ka reaguar ashpër pas vrasjes së Arlinda Zekajt në Kosovë, duke kritikuar dështimin e institucioneve për t’i mbrojtur gratë nga dhuna në familje.

Në një postim në Facebook, Ben-Meir ka rikujtuar luftën dhe vuajtjet që përjetoi populli i Kosovës në përpjekjen për liri, duke thënë se është e turpshme që gratë vazhdojnë të vriten në shtëpitë e tyre, ndërsa institucionet përgjegjëse dështojnë t’i mbrojnë.

Ai ka shkruar se vetëm gjatë këtij viti, sipas raportimeve, tetë gra janë vrarë si pasojë e dhunës në familje.

Duke iu referuar rastit të Arlinda Zekajt, profesori amerikan ka theksuar se ajo kishte kërkuar vazhdimisht mbrojtje nga autoritetet dhe kishte paralajmëruar se jeta e saj ishte në rrezik.

Megjithatë, sipas tij, vetëm tri ditë pas kërkesës së fundit për ndihmë, Arlinda u vra me sëpatë nga kunati i saj.

Ben-Meir ka shkruar se vrasja ndodhi pasi ajo po përpiqej ta kthente djalin e saj, i cili, sipas tij, ishte marrë nga familjarët e bashkëshortit.

“Ky është një turp kombëtar. Një vend që luftoi për lirinë e vet nuk duhet të pranojë kurrë një realitet në të cilin grave u mohohet liria më themelore nga të gjitha: e drejta për të jetuar”, ka shkruar ai.

Në reagimin e tij, Ben-Meir ka theksuar se Kosova, e cila ka kaluar luftë, përndjekje dhe vuajtje të papërshkrueshme në rrugën drejt lirisë, nuk duhet të pranojë që gratë të mbeten të pambrojtura nga institucionet që kanë për detyrë t’u garantojnë sigurinë.