Presidenti i Këshillit Evropian, Antonio Costa viziton sot Kosovën, takohet me liderët institucionalë dhe politikë

Presidenti i Këshillit Evropian, Antonio Costa, pritet të vizitojë sot Kosovën në kuadër të turit të tij zyrtar në vendet e Ballkanit Perëndimor.

Gjatë qëndrimit në Prishtinë, ai do të zhvillojë një sërë takimesh me drejtuesit më të lartë të institucioneve të vendit, si dhe me përfaqësues të skenës politike.

Në programin e vizitës janë paraparë takime me ushtruesen e detyrës së Presidentes, Albulena Haxhiu, dhe me kryeministrin në detyrë, Albin Kurti. Gjithashtu, Costa do të takohet edhe me përfaqësues të partive politike parlamentare.

Vizita zhvillohet në një periudhë të rëndësishme të marrëdhënieve mes Kosovës dhe Bashkimit Evropian. Gjatë takimeve pritet të diskutohen tema që lidhen me integrimin evropian të vendit, proceset reformuese, bashkëpunimin rajonal dhe perspektivën e zgjerimit të BE-së.

Para nisjes së turit në rajon, Costa deklaroi se qëllimi i vizitave është të konfirmojë mbështetjen dhe përkushtimin e Bashkimit Evropian ndaj vendeve të Ballkanit Perëndimor.

Ai ka vlerësuar se procesi i zgjerimit po hyn në një fazë të re, por ka nënvizuar se avancimi i secilit shtet do të varet nga progresi në reforma dhe përmbushja e standardeve të kërkuara nga BE-ja.

Pas ndalesës në Kosovë, Costa do të marrë pjesë më 5 qershor në Samitin BE–Ballkani Perëndimor që do të organizohet në Tivat.

Nën temën “Prosperiteti dhe stabiliteti i përbashkët i Bashkimit Evropian dhe Ballkanit Perëndimor”, samiti do të mbledhë liderë evropianë dhe rajonalë për të diskutuar mbi thellimin e bashkëpunimit në fushat politike, ekonomike dhe të sigurisë.

Vizita e presidentit të Këshillit Evropian shihet si dëshmi e interesimit në rritje të Brukselit për rajonin, në një kohë kur anëtarësimi në BE vazhdon të mbetet ndër objektivat kryesore strategjike të vendeve të Ballkanit Perëndimor.