Policia dhe Prokuroria Speciale me aksion në Zubin Potok, arrestohet një i dyshuar për krime lufte

Policia e Kosovës ka njoftuar për arrestimin e edhe një personi të dyshuar për krime lufte kundër popullsisë civile, në kuadër të hetimeve që po zhvillohen nga institucionet e drejtësisë për zbardhjen e krimeve të kryera gjatë luftës në Kosovë.

Sipas njoftimit zyrtar, arrestimi është kryer nga Drejtoria për Hetimin e Krimeve të Luftës e Policisë së Kosovës, me urdhër të Prokurorisë Speciale të Republikës së Kosovës

I arrestuari, me inicialet J.R., dyshohet për kryerjen e veprës penale “Krime lufte kundër popullsisë civile”.

“Arrestimi i të dyshuarit është rezultat i një pune intensive hetimore, të zhvilluar nga hetuesit policorë dhe Prokuroria Speciale, në kuadër të përkushtimit të vazhdueshëm institucional për hetimin dhe zbardhjen e krimeve të luftës”, thuhet në njoftimin e Policisë së Kosovës.

Autoritetet kanë bërë të ditur se hetimet lidhur me këtë rast do të vazhdojnë edhe në ditët në vijim, ndërsa institucionet përgjegjëse janë të përkushtuara për të ndriçuar të gjitha rastet që lidhen me krimet e luftës.

“Lidhur me rastin, Policia e Kosovës dhe Prokuroria Speciale do të vazhdojnë të ndërmarrin të gjitha veprimet e nevojshme hetimore, për çka publiku do të njoftohet në kohë”, thuhet më tej në njoftim.

Arrestimi i fundit vjen në kuadër të angazhimeve të vazhdueshme të Policisë së Kosovës dhe Prokurorisë Speciale për identifikimin dhe sjelljen para drejtësisë të personave që dyshohen për përfshirje në krime lufte, me qëllim që të sigurohet drejtësi për viktimat dhe familjet e tyre.