Mledan Adjançiq është zyrtari policor që shërben në Stacionin e Mitrovicës së Veriut i cili s’ka ngurruar të shpërndajë thirrje nacionaliste në profilin e tij në Instagram.
“Kur ushtria të kthehet në Kosovë”, është mbishkrimi i postimit nga grupi i njohur “Grobarska snaga”, që është grup i tifozëve të klubit serb të futbollit “Partizani”, të cilit iu bashkua Adjançiq, raporton Klan Kosova.
Por, për këtë veprim, polici i Kosovës u ndëshkua.
Kjo ndodhi kur Klan Kosova iu drejtua eprorëve të tij, të cilët menjëherë morën masa. Ata e suspenduan Adjançiqin për tre ditë, si masë administrative nga standardet profesionale, teksa këto ditë shërbejnë për hetimin e mëtutjeshëm të tij.
Sipas rregullave, një gjë e tillë është e sanksionueshme nga vetë institucioni që duhet të marrë masa.
Polici i diplomuar në gjeneratën e 61-të të Policisë së Kosovës, deri tani ka shërbyer në ekipin D në patrullim.
