Përparim Rama: Kurti po e përdor Skenderajn për manipulim politik dhe përçarje qytetare

Përparim Rama ka reaguar pas zhvillimeve të sotme në Skenderaj, duke akuzuar kryeministrin Albin Kurti për, siç tha ai, “manipulim politik” dhe nxitje të përçarjes mes qytetarëve.

Rama deklaroi se “Skenderaj u përdor si skenë për manipulimin e radhës politik”, duke shtuar se tensionet e krijuara sot janë të qëllimshme dhe të rrezikshme për stabilitetin e vendit.

Ai kritikoi edhe praninë e madhe të forcave policore në Drenicë, duke thënë se kjo “tregon nevojën për të projektuar autoritet dhe për të ushqyer një logjikë hakmarrjeje politike”.

“SKENDERAJ SOT U PËRDOR SI SKENË PËR MANIPULIMIN E RADHËS POLITIK NGA Albin Kurti.

Sot, Skenderaj u shfrytëzua për të nxitur përçarje mes qytetarëve, për të krijuar tensione artificiale dhe për të prodhuar një klimë konfrontimi politik. Kur një Kryeministër përdor institucionet, policinë dhe retorikën për të ndarë qytetarët dhe për të thelluar polarizimin shoqëror, ai nuk po qeveris ai po MANIPULON.

Ky është i njëjti kryeministër që ka REFUZUAR t’i përgjigjet ftesës së Prokurorisë Speciale të Republikës së Kosovës. Sepse ai është mbi ligjin. Ai është ligji.

Fakti që Drenica mbushet me forca policore tregon nevojën e tij të sëmurë për të projektuar autoritet dhe për të ushqyer një logjikë hakmarrjeje politike.

Duke e ditur sakrificën dhe vuajtjen që ka përjetuar Drenica, ta provokosh këtë trevë dhe ta etiketosh Kryetarin e saj si “Serbia” është një akt i ulët. Ta vësh në rrezik paqen sociale dhe t’i shtysh qytetarët drejt përçarjes dhe konfliktit është ligësi.

Ky tensionim i qëllimshëm dhe këto tentativa për destabilizim politik janë jashtëzakonisht të RREZIKSHME për popullin dhe shtetin e Kosovës.

Drenica nuk e meriton këtë. Kosova nuk e meriton këtë”, shkroi ai.