“Për problemet e Lipjanit e kemi zgjidhjen”, Buja e prezanton planprogramin që e kanë punuar 52 ekspertë

Në një intervistë për emisionin FIVE në RTV Dukagjini, Buja foli edhe për zhvillimet në fshatra dhe potencialin e tyre. Ai tha se Janjeva mund të zhvillohet dhe të rikthehet në qytezën që dikur ishte. Sipas tij, në hartimin e programit të tij kanë punuar 55 ekspertë nga Lipjani dhe vende të tjera, të cilët kanë identifikuar problemet ekzistuese dhe më pas kanë ndërtuar planin e detajuar qeverisës.

Duke u ndalur te fshati Gadime, Buja përmendi problemin e urave të vjetra që datojnë që nga koha e ish-Jugosllavisë.

“Janë dy ura të ngushta, shumë të rrezikshme”, tha ai.

Tutje, ai foli për Baicën, duke përmendur ujërat termale dhe mundësinë e zhvillimit të turizmit jo vetëm aty, por edhe në Gadime.

Buja veçoi edhe fshatin Shalë, ku sipas tij nuk funksionon sistemi i ujësjellësit. “Ka shumë probleme, por për të gjitha kemi zgjidhje”, theksoi ai. Ai shtoi se edhe Magura përballet me mungesë të ujit të pijshëm.

Sa i përket qytetit të Lipjanit, Buja tha se një nga sfidat kryesore është ndarja e tij nga hekurudha, e ndërtuar shumë vite më parë kur Lipjani ishte më i vogël. Ai akuzoi udhëheqjen aktuale të komunës për mosangazhim në bashkimin e qytetit me projekte nëntokësore ose mbitokësore.

“Ne në programin tonë qeverisës kemi planin e detajuar për ta bërë bashkimin e qytetit”, deklaroi Buja.