PDK: Kushtetuta nuk është pazar politik, fjalën duhet ta thotë Kushtetuesja

Partia Demokratike e Kosovës (PDK) ka reaguar për situatën rreth konstituimit të Kuvendit, duke e akuzuar Lëvizjen Vetëvendosje për shkelje të afateve dhe bllokim të procesit.

Në një postim në Facebook, PDK ka thënë se Kuvendi është dashur të konstituohet brenda afatit kushtetues, ndërsa ka theksuar se edhe afati i ri i 6 shtatorit nuk është respektuar.

Sipas PDK-së, partia ka marrë pjesë në seancat e 9 dhe 11 shtatorit me qëllim të përmbylljes së konstituimit, por procesi është penguar për shkak të mosmarrëveshjeve rreth zgjedhjes së nënkryetarëve të Kuvendit.

PDK pretendon se LVV ka vendosur kushte të reja politike, duke e lidhur zgjedhjen e nënkryetarëve me mënyrën e votimit për Presidentin e Republikës.

“Për Partinë Demokratike të Kosovës, Kushtetuta nuk është pazar politik”, thuhet në reagim.

PDK ka bërë të ditur se është duke përgatitur rastin që do t’i drejtohet Gjykatës Kushtetuese dhe se, deri në një vendim të saj, nuk do të marrë pjesë në seancat e Kuvendit.

“Mjaft me afate të shkelura, kushte të reja dhe pazare politike. Tani fjalën duhet ta thotë Gjykata Kushtetuese”, ka përfunduar PDK.