Deputetë të PDK-së dhe Aleancës, së bashku me asamblistë e drejtorë nga Skenderaj dhe Istogu, kanë vazhduar edhe sot aksionin e tyre para Qeverisë, duke bllokuar hyrjen e objektit që nga orët e mëngjesit.
Edhe këtë të hënë, thirrja e tyre ishte e njëjtë: të formohen sa më parë institucionet e vendit.
Deputeti i PDK-së, Mërgim Lushtaku, para mediave deklaroi se kur cenohet shteti dhe Kushtetuta, siç tha ai, cenohet edhe interesi më i madh i qytetarëve.
“Kur cenohet Kushtetuta dhe shteti i Kosovës, neve na keni përballë, sepse kemi edhe ne përgjegjësi të mbrojmë Kushtetutën, shtetin. Mos ta ngatërrojnë durimin tonë me frikë, sepse bash hiç nuk frikësohemi. Sepse kur protestojmë sot në mënyrë simbolike në numër më të vogël, nesër edhe në rrugë. Dhe sigurisht që ata të cilët e kanë marrë pushkën në dorë në kohën më të vështirë dhe e kanë hequr armikun shekullor nga Kosova, janë në mesin e PDK-së, si dhe të Aleancës, dhe ata kanë pasur guxim edhe më të madh. Besoj se kjo është punë më e vogël që e bëjmë për shtetin tonë”, tha Lushtaku.
Nga ana tjetër, deputetja e Aleancës, Albana Bytyqi, tha se për dy vjet Kosova po përballet me mungesë të funksionimit të institucioneve, ku, sipas saj, vendi, përballë sfidave që po kalon, po kërkon zgjidhje.
