Paralizohet transporti publik në Gjermani

Pothuajse në të gjithë Gjermaninë është ndërprerë transporti publik. Mijëra punonjës janë në një grevë 48-orëshe. Verdi, një nga sindikatat më të mëdha të sektorit publik në vend, është duke negociuar me bashkitë dhe autoritetet rajonale një marrëveshje të re kolektive në emër të tyre.

Bisedimet prekin rreth 150 kompani autobusësh, tramvajesh dhe trenash, me rreth 100 mijë punonjës në të gjithë Gjermaninë.

Prej mëngjesit të së premtes, metrotë, tramvajet dhe autobusët ndaluan së funksionuari. Vetëm disa prej tyre kanë operuar me orare të kufizuara emergjente. Këtu përfshihen qytete kryesore si Berlini, Hamburgu, Dusseldorf, Frankfurt, Stuttgart dhe Mynih. Mediat raportojnë se shërbimet e rregullta do të rifillojnë në orën 3:00 të mëngjesit të dielën.

Sindikata kërkon që të shkurtohen orët javore të punës dhe të rriten periudhat e pushimit midis ndërrimeve. Gjithashtu, që punonjësit të marrin paga më të larta për punën e orëve të natës dhe gjatë fundjavës. Kërkesat ndryshojnë nga një qytet në tjetrin.

Greva nuk do të ndikojë në transportin publik të operuar nga kompania hekurudhore “Deutsche Bahn”, që do të thotë se trenat rajonalë dhe të distancave të gjata, si dhe disa nga trenat periferikë, do të vazhdojnë të funksionojnë.