Gazetari Adriatik Kelmendi ka paralajmëruar ditë të zeza për Kosovën në rast se konstituimi i Kuvendit do të dështojë sot.
Sipas Kelmendit, dy deputetë nga një parti po ua ndalojnë punën 118 deputetëve tjerë të Kuvendit të Kosovës.
“Nëse sonte deri në mesnatë nuk konstituohet Kuvendi, kjo datë do të mbetet në histori si dita e zezë kur dy deputetë krye në vete vendosën ta shuajnë institucionin më të lartë të shtetit – Kuvendin. Dy deputetë nga një parti, në koordinim me njëri-tjetrin, ua ndalojnë punën 118 deputetëve të tjerë”, thuhet në postimin e tij në Facebook.
Kelmendi ka thënë se histori do të çuditet, ndërkaq ditë të zeza do të vijnë për Kosovën.
“Historia gjithsesi do të çuditet se si ndodhi që edhe 118 deputetë të tjerë iu nënshtruan vullnetit të vetëm dy deputetëve. Çka bënë ata 118 për ta ruajtur Kuvendin e Republikës së Kosovës?! Momentalisht Kosova nuk ka kryeministër fuqiplotë, nuk ka President, nuk ka Kryetar Kuvendi. Legjitimë janë vetëm deputetët. Por çuditërisht një deputet shkon në zyre dhe punon si kryeministër dhe një deputete tjetër shkon në një zyre dhe punon si Kryetare e Kuvendit dhe në një tjetër zyre si Presidente. Veç deputetët e tjerë nuk lejohen të shkojnë në punën e vet”.
“Edhe pse deputetët janë të vetmit që gëzojnë besimin direkt të qytetarëve për vendin e tyre të punës. Zor të ketë ndonjë armik të Kosovës i cili nuk do t’i gëzohej një zhvillimi të këtillë! Ditë të zeza për shtetin tonë!”, përfundon postimi i Kelmendti.
