Ish-deputeti i Aleancës për Ardhmërinë e Kosovës, Pal Lekaj, ka reaguar ashpër pas njoftimit se Partia Demokristiane e trashëguar nga veprimtari Mark Krasniqi ka hyrë në koalicion me Lëvizjen Vetëvendosje për zgjedhjet e 28 dhjetorit.
Lekaj ka deklaruar se kjo parti, e cila dikur identifikohej me vlera të mirëfillta të djathta, është shndërruar sot në një “degë të majtë”, duke u larguar nga parimet për të cilat ishte themeluar.
Sipas tij, udhëheqja aktuale e degës lokale të kësaj partie “as nuk i njeh e as nuk i kupton konceptet bazë të drejtimit politik”, duke akuzuar se drejtimin e kanë marrë individë të cilët “nuk kanë qenë pjesë e asnjë procesi të mirë për vendin”.
I plotë:
“Partia Demokristiane”, e trashëguar nga i ndjeri Mark Krasniqi, nga një parti me vlera të mirëfillta të djathta është kthyer në një “degë të majtë”.
Jam më se i bindur se udhëheqja e kësaj dege lokale as nuk i di e as nuk i kupton konceptet e drejtimeve politike, sepse pikërisht kjo udhëheqje e ka shkatërruar një parti që ishte simbol i vendit në shumë procese të rëndësishme. Në krye të saj erdhën njerëz që nuk ishin pjesë e asnjë procesi të mirë për vendin, dhe këtë e dëshmuan edhe me koalicionin me të majtën ekstreme në Kosovë, duke treguar se për ta kanë rëndësi vetëm interesat e një grupi klanor, që po e çon një nga partitë e para shqiptare në Kosovë drejt fundosjes.
I ftoj të gjitha strukturat dhe mbështetësit e vlerave të djathta që t’u bashkohen këtyre vlerave kombëtare për të mirën e vendit, sepse të gjithë e dimë se ku janë ato vlera kombëtare.
Kapitullimi i tyre është sot dhe kjo do të vërtetohet më 28 dhjetor.
