Pak orë pasi rimorën pushtetin ne veri, përfaqësues të Listës Serbe paraqiten nga Rashka në takim me Petkoviqin

Pak orë pasi përfaqësuesit e Listës Serbe morën pushtetin në komunat me shumicë serbe, përfshirë katër komunat në veri të Kosovës, ata u paraqitën në Rashkë në një takim me drejtorin e Zyrës për Kosovën në Qeverinë e Serbisë, Petar Petkoviq.

Pas takimit, Petkoviq deklaroi se “kthimi i komunave serbe në veri të Kosovës te populli” dhe “forcimi i mëtejshëm i komunave serbe në jug të Ibrit” është me rëndësi të madhe për “të ardhmen, të mirën dhe mbijetesën e popullit serb”.

“Po vijnë kohë më të mira edhe në Kosovë”, shkroi Petkoviq në një postim në Instagram.

Ai shtoi se “Serbia, nën udhëheqjen e presidentit Aleksandar Vuçiq, është gjithmonë aty për të mbështetur popullin e vet” dhe për të “siguruar ruajtjen e paqes dhe stabilitetit”.

Përfaqësuesit e Listës Serbe, që është partia kryesore e serbëve në Kosovë dhe gëzon mbështetjen e Beogradit zyrtar, e morën pushtetin lokal tri vjet pas largimit kolektiv të serbëve nga institucionet e Kosovës, në shenjë kundërshtimi ndaj disa vendimeve të Qeverisë së Kosovës.