Organizohet Panairi i Praktikave Profesionale në IAAP “Tafil Kasumaj” – Deçan

Në IAAP “Tafil Kasumaj” në Deçan u organizua me sukses panairi i praktikave profesionale, një aktivitet i rëndësishëm që synon lidhjen e arsimit me tregun e punës. Në këtë ngjarje morën pjesë nxënësit e profileve të ndryshme si Turizëm, Informatikë, Mjekësi, Ekonomi, Hidroinstalues dhe Automekanikë.

Nxënësit prezantuan punët dhe projektet e tyre në mënyra bashkëkohore dhe kreative, duke dëshmuar përgatitjen e tyre profesionale dhe aftësitë praktike të fituara gjatë shkollimit. Panairi shërbeu si një platformë ku ata patën mundësinë të shfaqin talentin dhe përkushtimin e tyre përpara vizitorëve dhe përfaqësuesve të bizneseve.

Në këtë aktivitet morën pjesë edhe bizneset partnere, të cilat prezantuan bashkëpunimin e tyre me nxënësit dhe mundësitë që ofrojnë për praktikë dhe punësim. Ky bashkëpunim është një hallkë kyçe në përgatitjen profesionale të të rinjve dhe në përafrimin e tyre me kërkesat reale të tregut të punës.

Një rëndësi e veçantë iu dha edhe pjesëmarrjes së nxënësve të klasave të nënta nga të gjitha shkollat fillore të Komunës së Deçanit, së bashku me drejtorët e tyre. Vizita e tyre në panair shërbeu si një mundësi e mirë për t’u njohur nga afër me profilet profesionale dhe për të orientuar zgjedhjen e tyre për të ardhmen.