Oda Ekonomike e Kosovës reagon pas linçimit të gjyqtarit të Komerciales: Politika mos të ndërhyjë në drejtësi

Oda Ekonomike e Kosovës ka reaguar lidhur me një vendim gjyqësor për dëmshpërblim në vlerë mbi 32 milionë euro, duke shprehur shqetësimin për ndikimin që raste të tilla mund të kenë në stabilitetin ekonomik dhe besimin e biznesit .

Reagimi i OEK vjen pas një vendimi të Gjykatës komerciale në lidhje me një pronë komunale në Prishtinë, e cila pasoi me lincimin e gjyqtarit të rastit nga eksponentë të politikës.

Në reagimin e Odës u bëhet thirrje institucioneve dhe akterëve politikë që të mos ndërhyrjnë në drejtësi.

“Si Odë Ekonomike e Kosovës, konsiderojmë se rastet që prekin drejtpërdrejt buxhetin publik dhe klimën e investimeve duhet të adresohen me përgjegjësi të lartë institucionale. Është e domosdoshme që sistemi i drejtësisë të veprojë në mënyrë të pavarur dhe pa ndikime të jashtme. Çdo tentativë për ta politizuar një vendim gjyqësor apo për të ushtruar presion ndaj institucioneve të drejtësisë dëmton besimin në sistem dhe rrit pasigurinë në sektorin privat”, thuhet në reagim.

Aty është kërkuar që të shmangen deklaratat që mund të dëmtojnë imazhin e bizneseve.

“Diskursi publik duhet të jetë i matur dhe i bazuar në fakte, në mënyrë që të ruhet integriteti i kompanive dhe të parandalohet dëmtimi i padrejtë i reputacionit të tyre. Bizneset kanë nevojë për një ambient të parashikueshëm, siguri juridike dhe trajtim të barabartë para ligjit. Prandaj, u bëjmë thirrje institucioneve dhe akterëve politikë që të tregojnë përmbajtje dhe përgjegjësi, duke shmangur çdo veprim që mund të interpretohet si ndërhyrje në drejtësi”, thuhet më tej.

Sipas Odës, vetëm përmes respektimit të parimeve të shtetit ligjor dhe funksionimit të pavarur të drejtësisë mund të sigurohet një klimë e qëndrueshme për zhvillim ekonomik dhe tërheqje të investimeve.