Objekti i Shoqatës së të Shurdhve në Mitrovicë merr pamje të re, renovimi nis këtë javë

Objekti i Shoqatës së të Shurdhve në Mitrovicë pritet t’i nënshtrohet një renovimi të plotë, në kuadër të një projekti të mbështetur nga Programi i Kombeve të Bashkuara për Zhvillim (UNDP).

Lajmin e ka bërë të ditur drejtori për Mirëqenie Sociale në Komunën e Mitrovicës, Ramadan Beshiri, përmes një postimi në Facebook, ku ka theksuar se po realizohet një premtim i dhënë më herët për përmirësimin e kushteve në këtë objekt.

“Kryetari e premtoi në fushatë. Unë si Drejtor, më 3 shkurt e vizitova Shoqatën e të Shurdhve dhe e bëra të qartë: premtimi do të mbahet. Pa kaluar as 7 muaj, renovimi i tërësishëm po fillon”, ka shkruar Beshiri.

Ai ka bërë të ditur se objekti tashmë është përfshirë në raundin e renovimeve të mbështetura nga UNDP-ja.

“Ndërtesa e Shoqatës është futur në raundin e renovimeve të mbështetur nga UNDP, ndërsa të mërkurën kontraktorët do të jenë në terren te objekti i shoqatës”, ka njoftuar ai.

Beshiri ka falënderuar kryetarin e Komunës së Mitrovicës, Faton Peci, si dhe UNDP-në për mbështetjen dhe realizimin e projektit.

“Faleminderit Kryetarit z. Faton Peci për përkushtimin dhe UNDP-së që po e realizon këtë projekt”, është shprehur drejtori i Mirëqenies Sociale.

Sipas njoftimit, punimet pritet të nisin gjatë kësaj jave, me qëllim të përmirësimit të kushteve për anëtarët dhe aktivitetet e Shoqatës së të Shurdhve në Mitrovicë.