Fadil Nura nga Partia Demokratike e Kosovës ka dalë sot me një thirrje publike kundrejt kreut të partisë, Memli Krasniqi, raporton GazetaDemos.
I njëjti ka kërkuar nga Krasniqi që të lirojë nga detyra dy anëtarë të PDK-së në KQZ, të cilët sipas tij dështuan të kontribuojnë dhe të mbrojnë qëndrimet e partisë të cilën e përfaqësojnë në mbledhjet e Komisionit Qendror të Zgjedhjeve.
“Duke marrë parasysh zhvillimet e fundit në skenën politike të vendit, si dhe angazhimin e vazhdueshëm të shumë anëtarëve tanë në mbrojtjen e votës së qytetarëve dhe të integritetit zgjedhor, vlerësojmë se sjellja e dy përfaqësuesve aktualë të PDK-së në KQZ ka qenë për keqardhje dhe në kundërshtim me interesat e partisë”.
Nura pa e specifikuar se për cilin rasht konkretisht bëhet fjalë, vlerësoi se sjelljet e të lartëcekurve dëmtojnë imazhin dhe besueshmërinë e PDK-së në KQZ.
“Në vend që të kontribuojnë në mbrojtjen e qëndrimeve të Partisë Demokratike të Kosovës dhe të reagojnë ndaj fyerjeve dhe sulmeve të përsëritura nga përfaqësues të Lëvizjes Vetëvendosje në mbledhjet e KQZ-së, këta anëtarë kanë dështuar të mbrojnë dinjitetin dhe qëndrimet politike të partisë. Sjellje të tilla dëmtojnë imazhin dhe besueshmërinë e Partisë Demokratike të Kosovës në një institucion të rëndësishëm siç është KQZ-ja”, tha ai.
Për këto arsye, kërkojmë nga Kryetari i Partisë Demokratike të Kosovës që të ndërmarrë menjëherë masat e nevojshme për t’i liruar nga detyra këta dy anëtarë të KQZ-së dhe për t’i zëvendësuar me përfaqësues të tjerë me integritet të lartë profesional e politik, të cilët do të mbrojnë me dinjitet interesat e Partisë Demokratike të Kosovës dhe votën e qytetarëve të Republikës së Kosovës”, tha ai.
