Kreu i Qeverisë në detyrë dhe kryetari i LVV-së, Albin Kurti, nuk është parë dje në asnjë aktivitet përgjatë festimeve të 28 nëntorit, as në Kosovë e as në organizimet e bëra në Shqipëri. Kurti vetëm kishte uruar dje përmes një postimi në faqen e tij.
Lëvizja Vetëvendosje ka zbuluar se Kurti ndodhet në Maltë, ku mori pjesë në Këshillin e Internacionales Socialiste.
Ai para socialistëve i thuri lavde punës së tij si kryeministër, duke thënë se e ka luftuar korrupsionin dhe se Kosova ka shënuar rritje ekonomike.
“Kryeministri i Kosovës shpjegoi se si në mandatin e tij lufta kundër korrupsionit ka kontribuar në rritjen ekonomike gjersa politikat sociale të rishpërndarjes e kanë bërë zhvillimin progres gjithpërfshirës.”, thuhet ndër të tjera në komunikatën e VV-së.
Sipas LVV-së, pjesëmarrja e Kryeministrit në detyrë Kurti në këtë forum ndërkombëtar “thekson angazhimin e Republikës së Kosovës në organizatat progresiste globale dhe rikonfirmon funksionin e saj aktiv në promovimin e paqes, dialogut e të lirisë, të demokracisë, solidaritetit dhe të drejtësisë”.
