Arianit Hajrizi, djali i Agim Hajrizit, ka publikuar një mesazh emocional, përmes të cilit shpreh dhimbjen dhe zhgënjimin për atë që e cilëson si harresë ndaj sakrificës së familjes së tij dhe të dëshmorëve të tjerë të vendit.
Në postimin e tij, ai kujton figurën e babait, duke e përshkruar si njeri që ndante gjithmonë edhe atë pak që kishte me të tjerët dhe që ishte ndër të parët që ngrihej për ta mbrojtur vendin sa herë rrezikohej liria.
“Janë njerëz që jetojnë përgjithmonë, jo sepse janë ende mes nesh, por sepse ideali i tyre nuk vdes kurrë”, shkruan ai në fillim të reagimit.
Më tej, Hajrizi ngre pyetje të drejtpërdrejta për mënyrën se si, sipas tij, është lënë në harresë sakrifica e Agim Hajrizit, i cili u vra së bashku me nënen, dhe djalin Ilirin gjatë luftës në Kosovë.
Ai shprehet se edhe pas 27 vitesh, shumë pak njerëz e vizitojnë varrin e dëshmorit, ndërsa shton se shoqëria sot është e përqendruar te interesat personale, fama dhe përfitimet materiale.