Gjykata Themelore në Ferizaj ua ka caktuar nga një muaj paraburgim të pandehurve me iniciale A.L. dhe R.J., të dyshuar për veprën penale “Mashtrimi”. Sipas gjykatës, dy të dyshuarit, bashkë me personin tjetër V.N., i cili ndodhet në arrati, dyshohet se kanë mashtruar tre persona duke u paraqitur si posedues të kriptovalutave të llojit USDT.
Sipas dosjes së rastit, të dyshuarit kishin marrë me qira një lokal në Ferizaj dhe kishin organizuar takim me viktimat, nga të cilat kanë arritur të marrin 12 mijë euro.
Paratë, sipas gjykatës, ishin futur në një çantë të gjelbër dhe vendosur në një dollap të modifikuar me vrimë nga pjesa e pasme, përmes së cilës të dyshuarit i kishin marrë pa dijeninë e viktimave.
Hetimet zbuluan se grupi po planifikonte të përdorte të njëjtën skemë edhe në Kaçanik, ku dy nga të dyshuarit u arrestuan nga policia në vendin e ngjarjes, ndërsa V.N. arriti të largohej.
Gjykata ka vlerësuar se ekziston dyshimi i bazuar për kryerjen e veprës penale dhe ka aprovuar kërkesën e Prokurorisë për caktimin e paraburgimit.
Komunikata e plotë:
1 muaj paraburgim ndaj A.L. dhe R.J. Ferizaj, 1 maj 2026 – Gjykata Themelore në Ferizaj – Departamenti i Përgjithshëm – Divizioni Penal, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurve A.L. dhe R.J., për shkak të dyshimit të bazuar se kanë kryer veprën penale mashtrimi nga neni 323 paragrafi 1 lidhur me nenin 31 të Kodit Penal të Republikës së Kosovës (KPRK). Pas mbajtjes së seancës dëgjimore dhe analizimit të shkresave të lëndës, gjyqtarja e procedurës paraprake në Departamentin e Përgjithshëm – Divizioni Penal, Alba Makolli, ka vlerësuar se: Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset, Gjyqtarja e procedurës paraprake, kërkesën e prokurorit të shtetit për caktimin e masës së paraburgimit kundër të pandehurve e ka aprovuar si të bazuar konform dispozitave të KPPRK-së, dhe të njëjtëve i`u është caktuar masa e paraburgimit në kohëzgjatje prej një (1) muaj. Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.
