Këshilli Drejtues i Partisë Demokratike të Kosovës (PDK) do të mblidhet sot në orën 16:00, ku pritet të dalë me një deklaratë politike lidhur me gjendjen aktuale politike në vend.
Përmes kësaj deklarate do të formalizohen qëndrimet dhe veprimet e partisë në raport me zhvillimet politike dhe çështjet me rëndësi për qytetarët.
Kjo mbledhje vjen pikërisht tetë ditë para skadimit të afatit të Gjykatës Kushtetutuese për zgjedhjen e Presidentit.
Përveç deklaratës politike, anëtarët e Këshillit të Përgjithshëm të PDK-së do të informohen edhe për zgjedhjet e 28 dhjetorit 2025.
Sot pas dështimit të marrëveshjes ndërmjet LDK-së dhe VV-së, kryeministri Albin Kurti ka njoftuar se i ka dërguar një mesazh kreut të PDK-së, Bedri Hamza. “Para se të vija këtu i kam dërguar mesazh kryetarit të PDK-së, Bedri Hamza dhe të shohim tash çka është e mundur që të ecim përpara”, tha Kurti.
Mirëpo ai shtoi se oferta që ishte për LDK-në nuk vlen për PDK-në.
“Propozimi ynë oferta jonë që u refuzua për bashkëqeverisje me LDK, ka qenë ekskluzive për LDK-në. Ju duhet të kuptoni që vetë LDK nuk ka konsideruar asnjëherë që asaj i takon presidenti. Duhet ta kuptoni situatën e vështirë që ndodhem unë, nuk mund të bëhem më LDK se vetë LDK-ja”, tha Kurti.
