Nis seanca gjyqësore ndaj Naim Murselit e të tjerëve në rastin e Liridona Ademajt, dëshmon vëllai i saj

Ka filluar seanca gjyqësore ndaj Naim Murselit, Kushtrim Kokallës dhe Granit Plavës, për organizimin dhe vrasjen e Liridona Ademajt, raporton Gazeta Demos.

Me duar lidhur e kokë ulur, i akuzuari Naim Murseli bashkë me dorasin Granit Plavën dhe organizatorin Kushtrim Kokalla, sillen në sallën e gjykatës, ku sot pritet të dëshmoj vëllai i Liridonës.

Tri ditë më parë, Instituti i Psikiatrisë Forenzike ka përfunduar vlerësimin psikiatrik ndaj Naim Murselit, i cili akuzohet për organizimin e vrasjes së bashkëshortes së tij, Liridonës.

Në raport theksohet se: “Tek i ekzaminuari Naim Murseli nuk është konstatuar ndonjë çrregullim mendor apo sëmundje mendore e karakterit të përkohshëm apo përhershëm”.

Gjithashtu, ekspertët nuk kanë gjetur asnjë shenjë të abuzimit me substanca narkotike apo alkool, e as ndonjë pengesë në zhvillimin mendor që do të ndikonte në perceptimin e realitetit.

Sipas raportit, në momentin e kryerjes së krimit, Murseli ka qenë në gjendje të kuptojë veprimet e tij dhe pasojat që ato shkaktojnë.