Një 29-vjeçare shqiptare është qëlluar për vdekje me armë nga bashkëshorti i saj, Anthony Deschepper, 38-vjeç.
Ngjarja e rëndë ka ndodhur në parkingun e një qendre tregtare në Brampton të Kanadasë kur burri e ka qëlluar atë në një parking, duke e lënë të vdekur në vend.
Familja ka identifikuar viktimën e vrasjes së ndodhur të martën pasdite si Savannah Kulla, 29 vjeçe, me prejardhje shqiptare.
Sipas raportimit të CP24, Kulla ishte nënë e katër fëmijëve të vegjël – tre djemve dhe një vajze njëvjeçare, e cila u bë objekt i një Amber Alert-i pasi dyshohej se ishte marrë nga i ati, Anthony Deschepper, menjëherë pas ngjarjes tragjike.
Policia njoftoi se foshnja u gjet e sigurt pak më vonë në rajonin e Niagarës, ndërsa Deschepper, i identifikuar si i dyshuari për vrasjen, ndërroi jetë pas një përballjeje me policinë në një stacion karburanti në Niagara Falls.
Njësia Speciale e Hetimeve të provincës ka bërë të ditur se një grua tjetër, e cila po ngiste veturën ku ndodhej Deschepper në momentin e incidentit, po hetohet dhe pritet të akuzohet.
