Xhamia e Ibrit, e ndërtuar në vitin 1777 dhe e djegur më 2 maj 1999, do të rindërtohet, në kuadër të angazhimeve institucionale për ruajtjen e trashëgimisë kulturore në Kosovë.
Sot, në një ceremoni zyrtare, u nënshkrua marrëveshja e bashkëpunimit për hartimin dhe zbatimin e projektit të rekonstruktimit të këtij objekti me rëndësi historike dhe kulturore. Në këtë aktivitet morën pjesë Myftiu i Kosovës Naim Tërnava, kryeimami Vedat Sahiti dhe ministrja Saranda Bogujevci.
Njoftimi i Kurtit;
Xhamia e Ibrit, e ndërtuar në vitin 1777 dhe e djegur më 2 maj 1999, do të rindërtohet.
Sot, së bashku me Myftiun Naim Tërnava, kryeimamin Vedat Sahiti dhe ministren Saranda Bogujevci, nënshkruam marrëveshjen e bashkëpunimit për hartimin dhe zbatimin e projektit të rekonstruktimit të saj. Me këtë memorandum, Qeveria e Republikës së Kosovës mbështet ringritjen e këtij monumenti me rëndësi historike dhe kulturore.
Në vazhdim, nënshkruam edhe një memorandum tjetër bashkëpunimi me Bashkësinë Islame të Kosovës, i cili synon forcimin e ruajtjes dhe promovimit të trashëgimisë kulturore islame.
Këto angazhime janë pjesë e përkushtimit tonë të vazhdueshëm për mbrojtjen e trashëgimisë kulturore në vend, pas dëmeve të shkaktuara gjatë luftës së viteve 1998–1999.
Investimet në këtë fushë do të vazhdojnë edhe në vitet në vijim.
