Shqiptarët nuk e preferojnë verën e prodhimit vendas kjo shihet edhe tek të gjithë ekspozitorët e restoranteve të cilat janë të mbushura me verë të huaj.
Sipas të dhënave doganore gjatë vitit 2025 në Shqipëri janë importuar 6,548,000 litra ku dominohet nga vera italiane, kosovare dhe franceze me çmime që variojnë nga 80-600 lekë\litër verë .
Ndërsa vera premium mbërrin nga Holanda dhe Spanja në shuma nga 1000-4000 lekë, por kjo në një sasi tepër të vogël.
Nga ana tjetër kantinat shqiptare po në të njëjtin vit prodhuan 1,502,000 litra verë.
Fakti që ne bëjmë gëzuar me verë që prodhohet jashtë kufijve tanë, nuk do të thotë që vera e shtëpisë nuk është cilësore. Sipas ekspertëve të bujqësisë vera e importit e konkurron atë të vendit në sasi dhe çmim, por kurrsesi në cilësi. Por për verën e shtëpisë bëhet shumë pak marketing.
Eksperti i bujqësisë, Agim Rrapaj thotë: “Arsyeja kryesore është se Shqipëria në marrëveshjen që ka më BE ka pranuar që një kuotë vere të hyjë pa taksa. Kjo bën që njësitë e shitjes në Shqipëri të preferojnë këtë verë sepse e shesin me një çmim 4-5 herë më shumë që ka më tepër leverdi. Ndërsa vera shqiptare është e prodhuar nga rrushi dhe njëkohësisht nuk ka marketing”.
Në shtetet e tjera produkti vendas mbrohet jo vetëm duke e mbështetur financiarisht, por edhe duke I ofruar një klimë të mirë biznesi, që të vijë sa më lehtë në tryezën e konsumatorit.
“Shumë vende e kanë zgjidhur këtë që i detyrojnë OBU që të kenë një stendë më vërë shqiptare. Ne kemi kërkuar këtë tek Ministria e Bujqësisë dhe ajo e Ekonomisë, ku të detyrojë të gjitha njësitë e shitjes që verën shqiptare kenë në tregun e tyre. Kjo gjë nuk bëhet” , shton eksperti.
Ata që dëmtohen më shumë nga kjo zgjedhje, janë fermerët e vreshtave dhe prodhuesit e verës të cilët prej vitesh në kantinën e tyre u ka mbetur stok produkti i verës, edhe pse vera jonë në Europë është vlerësuar me pikët maksimale të shijes dhe cilësisë.
