Në KQZ s’kalon propozimi i VV-së për shtyrjen e afatit për regjistrimin e votuesve jashtë Kosovës

Komisioni Qendror i Zgjedhjeve, nuk e ka miratuar propozimin e përfaqësuesve të Lëvizjes Vetëvendosje për shtyrjen e afatit të regjistrimit të votuesve jashtë Kosovës dhe mundësinë e ndryshimit të vendvotimit për votuesit brenda vendit deri të dielën në ora 16:00.

Propozimi mori vetëm katër vota për. Kundër u shpreh edhe kryetari i KQZ-së, Kreshnik Radoniqi.

Sekretariati i KQZ-së ishte shprehur paraprakisht kundër shtyrjes, duke theksuar se një vendim i tillë do të rrezikonte menaxhimin e procesit zgjedhor.

Në mbledhjen e sotme po ashtu u mor vendim që tërheqja e shortit për renditjen e subjekteve politike në fletëvotimin e zgjedhjeve të parakohshme për Kuvendin e Kosovës, do të bëhet të dielën.

Sipas vendimit të ri të KQZ-së, tërheqja e shortit, e paraparë të mbahet më 8 dhjetor, do të mbahet një ditë më herët, më 7 dhjetor.

Tërheqja e shortit do të bëhet në ora 14:00.