Ndodh edhe kjo: “Çfarë vendosi Kushtetuesja për Nenad Rashiqin?” përfundon në Testin e Maturës

Një nga kontestet e fundit kushtetuese që përfshin deputetët e Listës Serbe është shndërruar në pyetje për maturantët. Pyetja nr. 89 e testit kërkon nga nxënësit të dinë se çfarë kishte vendosur Gjykata Kushtetuese për zgjedhjen e Nenad Rashiqit si nënkryetar të Kuvendit.

Në fotografinë e testit, pyetja nr. 89 i referohet deputet të Listës Serbe, Nenad Rashiqit, Kuvendit të Kosovës dhe një aktgjykimi të Gjykatës Kushtetuese të nxjerrë vetëm disa muaj më parë.

“Në vitin 2025, deputetët e Listës Serbe dorëzuan një kërkesë në Gjykatën Kushtetuese të Kosovës duke kontestuar kushtetutshmërinë e zgjedhjes së Nenad Rashiq si nënkryetar serb i Kuvendit të Kosovës. Çfarë vendosi Gjykata Kushtetuese lidhur me këtë rast?”

Maturantëve u janë ofruar katër alternativa: se posti duhej t’i takonte vetëm Listës Serbe; se zgjedhja e Rashiqit duhej të përsëritej me votim të ri; se zgjedhja ishte në përputhje me Kushtetutën; apo se Kuvendi kishte shkelur procedurat parlamentare dhe zgjedhja ishte e pavlefshme.

Gjykata Kushtetuese kishte vendosur se vendimi i Kuvendit i 10 tetorit 2025 për zgjedhjen e Rashiqit nuk ishte në përputhje me Kushtetutën dhe Rregulloren e Kuvendit, pasi zgjedhja e tij nuk kishte ardhur nga propozimi i shumicës së deputetëve të komunitetit serb. Por Gjykata përcaktoi njëkohësisht se aktgjykimi nuk kishte efekt prapaveprues, duke u thirrur në parimin e sigurisë juridike.

Alternativa D është më e afërta me konstatimin e Kushtetueses, por edhe ajo e formulon si “zgjedhja ishte e pavlefshme”. Ky formulim nuk e tregon me saktësi juridike faktin se vetë Gjykata përcaktoi që aktgjykimi të mos kishte efekt prapaveprues.

Në udhëzuesin zyrtar të Ministrisë së Arsimit për Maturën 2026 thuhet se provimi është vlerësim i “arritjeve, njohurive, shkathtësive dhe aftësive” që nxënësit kanë fituar gjatë arsimit parauniversitar, në përputhje me Kurrikulën e Republikës së Kosovës

Nuk dihet se cilën njohuri apo kompetencë të përcaktuar në Kurrikulë synon të vlerësojë kjo pyetje, veçanërisht kur asnjëra prej alternativave të ofruara nuk e pasqyron me saktësi të plotë atë që ka vendosur Gjykata Kushtetuese.

Afati i dytë i Provimit të Maturës po mbahet sot, më 29 gusht, në 55 qendra testimi. Nga 5,033 aplikime, Ministria ka bërë të ditur se janë aprovuar 4,967 kandidatë. Testi përmban 100 pyetje nga katër lëndë dhe, sipas udhëzimeve zyrtare, kandidatët kanë 150 minuta për përfundimin e tij.