Nasim Haradinaj përkujton Agron Haradinajn nq 3-vjetorin e vdekjes: Ne do ta mbajmë gjallë betimin

Ish-nënkryetari i OVL UÇK-së, Nasim Haradinaj, ka kujtuar ish-luftëtarin e UÇK-së, Agron Haradinajn në 3-vjetorin e ndarjes nga jeta, shkruan GazetaDemos.

Përmes një postimi në Facebook, ai u shpreh krenar me veprën e Agronit, duke thënë se “kur të thërret atdheu, nuk peshohen interesat personale”.

“E di që të kam munguar atëherë kur kishe më shumë nevojë për mua. Kjo është një peshë që nuk largohet lehtë. Por jam i bindur se më ke kuptuar, sepse ishim rritur me një parim të qartë: kur të thërret atdheu, nuk peshohen interesat personale dhe nuk analizohen mungesat tona”, thuhet në postimin e Haradinajt.

“Sot ti qëndron krah për krah me shokët e idealit dhe të luftës, dëshmorë e heronj. Preheni të qetë në Kompleksin Memorial të Gllogjanit, vend që nuk është vetëm një fshat, por simbol i sakrificës dhe i rrugës drejt lirisë”, shtoi ai.

Postimi i plotë:

Sot bëhen 3 vite që u nise për amshim, Agron.

E di që të kam munguar atëherë kur kishe më shumë nevojë për mua. Kjo është një peshë që nuk largohet lehtë. Por jam i bindur se më ke kuptuar, sepse ishim rritur me një parim të qartë: kur të thërret atdheu, nuk peshohen interesat personale dhe nuk analizohen mungesat tona.

Me atë edukatë, me atë amanet familjar, e çamë rrugën përpara, pa u ndalur e pa u përkulur, derisa liria u bë realitet.

Sot ti qëndron krah për krah me shokët e idealit dhe të luftës, dëshmorë e heronj. Preheni të qetë në Kompleksin Memorial të Gllogjanit, vend që nuk është vetëm një fshat, por simbol i sakrificës dhe i rrugës drejt lirisë.

Prehu i qetë. Ne do ta mbajmë gjallë betimin.