MINTI dhe AUV nisin kontrollet në treg për produktet e qumështit, verifikohen etiketat dhe deklarimet

Ministria e Industrisë, Ndërmarrësisë, Tregtisë dhe Inovacionit (MINTI), në bashkëpunim me Agjencinë e Ushqimit dhe Veterinarisë (AUV), ka nisur një aksion të koordinuar për inspektimin e produkteve të qumështit në tregjet e Kosovës.

Aksioni vjen pas raportit të AUV-së mbi rezultatet laboratorike të mostrave të analizuara nga produktet e qumështit, ndërsa inspektimet do të fokusohen në verifikimin e deklarimeve, etiketimit dhe mënyrës së paraqitjes së produkteve në treg.

Sipas MINTI-t, kontrollet do të përfshijnë si produktet vendore, ashtu edhe ato të importuara, me qëllim mbrojtjen e konsumatorëve dhe garantimin e informimit të saktë për përbërjen dhe cilësinë e produkteve ushqimore.

Institucionet kanë paralajmëruar se kompanitë, produktet e të cilave rezultojnë se nuk përputhen me deklarimet në etiketa, duhet të ndërmarrin menjëherë masa për korrigjimin e tyre dhe tërheqjen e produkteve nga tregu.