Reagimi i parë publik i Arbana Osmanit për protestat që po tronditin Shqipërinë nuk është pritur aspak mirë nga një pjesë e ndjekësve të saj!
Moderatorja e njohur ka thyer heshtjen pas disa ditësh protestash studentore dhe përplasjesh me policinë, por në vend të mirëkuptimit, është përballur me një valë komentesh kritike, ku shumë qytetarë e akuzojnë se është kujtuar tepër vonë për të ngritur zërin.
Përmes një postimi në Instagram, Arbana shpjegoi se kishte zgjedhur të mos reagonte menjëherë, pasi fillimisht dëshironte të kuptonte më mirë situatën.
“Kam zgjedhur të hesht këto ditë, për të kuptuar më mirë se ç’po ndodh”, shkroi ajo, duke shtuar se ngjarjet në Shqipëri nuk janë një reality show që duhet komentuar me tifozllëk nga divani apo një mundësi për të mbledhur pëlqime në Instagram.
Si nënë e tre fëmijëve, moderatorja shprehu shqetësimin për të rinjtë që po përballen me dhunë, por edhe për dëmet e shkaktuara në kryeqytet.
Në fund, ajo iu drejtua drejtpërdrejt kryeministrit Edi Rama me mesazhin: “Mjaft; respekto popullin tënd, dëgjoje”.
Por pikërisht shpjegimi i saj për heshtjen disaditore duket se ka nxitur reagimet më të ashpra.
“Më mirë mos të kishe folur fare!”, shkroi një ndjekëse, ndërsa një tjetër komentoi: “Po shumë herët reagove, o Bana”.
Një koment tjetër, që mori qindra pëlqime, e kritikonte moderatoren për faktin se fëmijët e saj nuk përballen me të njëjtat vështirësi si shumë qytetarë të tjerë.