Mbi 1 mijë e 800 operacione në gjashtë muaj në Spitalin e Mitrovicës

Nga ky institucion kanë bërë të ditur se rezultatet janë arritur falë punës së ekipeve mjekësore dhe stafit mbështetës, të angazhuar në ofrimin e shërbimeve kirurgjike për pacientët.

Në periudhën janar–qershor 2026, në Spitalin e Përgjithshëm “Dr. Smi Haxhibeqiri” janë kryer gjithsej 1 mijë e 824 operacione-ndërhyrje kirurgjike në repartet e ndryshme.

“Këto operacione janë realizuar me angazhimin e mjekëve specialistë të profileve kirurgjike, anesteziologëve, teknikëve të anestezionit, infermierëve dhe të gjithë stafit mbështetës”, është bërë e ditur nga spitali.

Sipas statistikave të publikuara, numrin më të madh të ndërhyrjeve e kanë realizuar repartet e Obstetrikës dhe Kirurgjisë, me nga 334 operacione secila. Pas tyre renditen Oftalmologjia me 327 ndërhyrje, Ortopedia me 326, si dhe ORL-ja me 282 operacione.

Në Urologji gjatë kësaj periudhe janë kryer 144 ndërhyrje kirurgjike, ndërsa në Gjinekologji janë realizuar 77 operacione.

Nga Spitali i Përgjithshëm në Mitrovicë kanë vlerësuar kontributin e stafit shëndetësor, duke theksuar se puna ekipore ka qenë një faktor i rëndësishëm në realizimin e këtyre ndërhyrjeve.

“Falë përkushtimit dhe bashkëpunimit të të gjitha ekipeve shëndetësore, është bërë i mundur ofrimi i shërbimeve cilësore dhe trajtimi i pacientëve në kohën e duhur”, thuhet në njoftimin e institucionit.