Analisti politik, Agon Maliqi, lidhur me kërkesën e Ambasadës Amerikane ka thënë se është në interesin e Kosovës që ta pranojë kërkesën për gazin amerikan.
Sipas Maliqit, pranimi i gazit të lëngshëm natyror amerikan është edhe çështje e shtetndërtimit të Kosovës. Kjo për shkak të mbështetjes amerikane për Kosovën në aspektin diplomatik dhe të sigurisë.
“Unë besoj që është interes strategjik i Kosovës përfshihet në korridoret e tranzitit të gazit amerikan dhe përfshihet në projektet e propozuara për diversifikimin e energjisë dhe përfshirjen e gazit si një prej komponenteve të prodhimit të energjisë. Kjo nuk është diçka që duhet të bëhet si… do të thotë për arsye ekonomike, pra padyshim është edhe ky element, siguria energjike është shumë e rëndësishme për energjinë, për ekonominë, por është edhe shumë e rëndësishme për sigurinë kombëtare për shkak se përfshirja e SHBA-ve si faktor dominues energjetik në rajon është garanci e përfshirjes së SHBA-ve si faktor i sigurisë dhe në këtë kuptim është edhe element shumë i rëndësishëm i sigurisë së Kosovës dhe i angazhimit të SHBA-ve diplomatik për Kosovën, por edhe në mbështetje në fusha të tjera, përfshirë edhe FSK-në dhe elemente të tjera. Pra, shumë të rëndësishme për shtetndërtimin e Kosovës”, është shprehur Maliqi.