Ish-kryeministri shqiptar Pandeli Majko ka reaguar përpara shpalljes së vendimit në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit në Hagë, duke e cilësuar këtë moment si një pikë të rëndësishme për shqiptarët dhe marrëdhëniet e tyre me Perëndimin.
Në një shkrim me titull “Liria nuk gjykohet…”, Majko paralajmëron se çdo vendim i Gjykatës Speciale nuk duhet të shndërrohet në arsye për një përplasje të shqiptarëve me Perëndimin.
Sipas tij, ekziston rreziku që një vendim i pafavorshëm të përdoret politikisht për të nxitur pakënaqësi ndaj Perëndimit dhe për të krijuar perceptimin se drejtësia ndërkombëtare dhe Perëndimi janë kundër shqiptarëve
Postimi i plotë:
LIRIA NUK GJYKOHET…
Urimi për pafajësinë e Hashim Thaçit, Kadri Veselit, Rexhep Selimit dhe Jakup Krasniqit është sot edhe një peshë!
Ky urim rëndon, pasi ai ka përballë të paparashikueshmen!
Besimi në dicka, nuk e bën atë, të vërtetë!
Gjykimi në Hagë po futet në protokollet e fundit përpara shpalljes së vendimit më 16 shtator 2026!
Pritshmëria për vendimin e Hagës është e ndarë në atë shqiptare dhe në atë serbe!
Për fat të keq, gjykimet e Hagës kanë prodhuar këtë ndjesi edhe për kombet e tjera! Në çdo rast, në njërin krah qëndrojnë boshnjakët, kroatët dhe shqiptarët kurse përballë tyre janë serbët!
“Teknika” e gjykimeve ndërkombëtare të Hagës për ti shpallur fajtorë që të gjithë, për luftën që shkatërroi Jugosllavinë, nuk kanë krijuar pajtimin e pritshëm! E kundërta është e vërtetë! Ceremonia shtetërore në Serbi, për kriminelin e luftës Ratko Mlladiç që vdiq në burgun e Hagës, ishte tregues se drejtësia ndërkombëtare nuk u konsiderua e tillë!
Ballkani ka qenë një tokë ku veset janë kthyer në rregulla!
Me rastin e daljes së vendimit gjyqësor në Hagë shpresa e politikës antishqiptare dhe “prestanomeve” të tyre, është pritshmëria për një “kryengritje” pakënaqësie shqiptare ndaj Perëndimit!
Kjo pritshmëri antishqiptare po e nxit këtë ide të bazuar në mundësinë e dënimit të drejtuesve të UÇK-së në gjykatën e Hagës!
Kjo “kryengritje” po aludohet ngadalë, por bindshëm!
Strategjia në fjalë shpreson që zemërimi shqiptar karshi një gjykate ndërkombëtare ti tregojë ata (shqiptarët) si faktor antiperëndim! Duke filluar nga Beogradi, edhe të tjerë, presin që një “vendim negativ” i gjykatësve të Hagës ta barazojë atë si qëndrim i Perëndimit karshi shqiptarëve!
