Lushtaku i përgjigjet Faton Pecit: Pse heshtni për raportimet për Lulin e Mitrovicës?

Deputeti i PDK-së, Mërgim Lushtaku, i është përgjigjur deklarimeve të ministrit Faton Peci, i cili e kritikoi për shpërndarjen e një fotografie të ministres Donika Schwarz-it me flamurin e Serbisë.

Lushtaku, përmes një reagimi, tha se nuk ka problem t’i përgjigjet Pecit, duke iu referuar deklarimeve publike të Schwarz-it lidhur me pretendimet se kishte dorëzuar dosje në Dhomat e Specializuara.

“Po ta kisha shpërndarë me ndonjë flamur tjetër, do ta kisha ofenduar atë flamur”, ka shkruar Lushtaku.

Ai më pas ka ngritur pyetje ndaj Pecit lidhur me raportimet e mëhershme për Lulzim Ademi-Lulin e Mitrovicës. Lushtaku iu referua një raportimi të 17 nëntorit 2021 dhe pretendimeve të KMDLNJ-së për të kaluarën e Ademit gjatë luftës.

“Ku ishte ky zë ankese kur Klan Kosova raportoi […] se Lulzim Ademi-Luli i Mitrovicës kishte shërbyer si polic i Serbisë deri në vitet ’99?”, ka shkruar ai.

Lushtaku ka kërkuar gjithashtu sqarime nga Peci për atë që ai e përshkruan si lidhje të partisë dhe familjes së tij me Lulzim Ademin, duke ngritur pyetjen: “Çfarë ju lidh juve si parti dhe familje me Lulin…?”