Kandidatja për deputete nga radhët e LDK-së, Jehona Lushaku-Sadriu ka kritikuar ashpër qeverisjen e kryeministrit në detyrë, Albin Kurti ku foli rreth çmimeve e mosndërtimin e çerdheve të premtuara.
Ish-deputetja tha se, sipas saj, ndoshta kryeministri në detyrë Albin Kurti, nuk e bashkëndjen nevojën e ngritjes së çmimeve dhe atë për ndërtimin e çerdheve, pasi siç tha ajo, familja e tij nuk është në Kosovë.
“Fëmijët tanë po rriten në kushte të njëjta qysh jemi rritur ne. Është për gjynah, është dëm i madh. Por ndonjëherë e mendoj, që ndoshta ky njeriu që po na qeverisë neve, nuk e ka ndjenjën, nuk e bashkëndjen punën e çerdheve sepse nuk e ka familjen këtu, nuk e bashkëndjen as punën e shkollave, as të sigurisë”, tha Lushaku-Sadriu në Klan Kosova.
“Në Norvegji ku jeton familja e tij, ndotja e ajrit është temë aktuale, te ne nuk po kemi mundësi me shku te ndotja e ajrit sepse jemi duke u përpjekur për ekzistencë. Qysh me ia bë punës të produkteve bazike, që qumshti kushton më shtrenjtë, buka, kripa, vaji, por Kurti s’e ka këtë problem, sepse në Norvegji flasin për cilësinë e ajrit”.
