Policia e Kosovës ka liruar para pak minutash zëdhënësin e komunës së Skenderajt, Amir Lushtaku, dhe Bekim Nurën, shofer i nënkryetari Fadil Nura.
Lushtaku dhe Nura u arrestuan mbrëmë për sulmin ndaj Hysni Mehanit, kryetar i Lëvizjes Vetëvendosje në Skenderaj, raporton Veriu.info.
Ndërkaq, djali i Sami Lushtakut, Mërgim Lushtaku ka sqaruar se ende nuk ka filluar intervistimi pasi pritet që të vijë njësiti për intervistim.
Ai gjithashtu kritikoi kryeministrin në detyrë të Kosovës Albin Kurti për provokimin e djeshëm siç e quajti ai.
“Ku ka sjellë edhe me urdhër të Sveçlës dhe Albin Kurtit njësinë speciale me armë të gjata. Dhe sigurisht që qytetarët e shohin si provokim. Sepse ne e dimë që derisa ka incidente të vogla, po s’ka rrezik jete, ku në Prishtinë edhe vriten e nuk shkojnë as policia me forma të tilla, me maska, me armë të gjata, shihet qartë që ka provokim. Provokim prej pushtetit. Edhe ne asnjëherë nuk i kemi ikur drejtësisë, gjithmonë babai im u është përgjigjur institucioneve të shtetit tonë, që dëshmorët, invalidët, veteranët, i gjithë populli shqiptar kanë sakrifikuar për me pas një shtet të tillë, një shtet demokratik. Prandaj besoj që është e rëndësishme që qytetarët e thonë me vetë prezencën e tyre, ku sot janë me Sami Lushtakun, janë me të vërtetën e jo me propagandën”, tha ai.
“Po, ka një ftesë. Derisa s’ka ardhë ftesa ne nuk i jemi përgjigjur. Meqenëse ka ardhë ftesa në zyrën e komunës së Skënderajt, atëherë ne i kemi përgjigjur”, tha ai.
Ai sqaroi se ende nuk ka filluar intervistimi pasi njësiti për intervistim ende nuk ka arritur.
“Jo nuk ka intervistim. Presim që të vjen njësiti për intervistim. Kur të vijnë ata, vjen edhe ai”, tha ai.
