Liderja e opozitës në Venezuelë, María Corina Machado, ka deklaruar se nuk ka komunikuar me Presidentin amerikan Donald Trump që nga muaji tetor dhe premtoi se do të kthehet në Venezuelë “sa më shpejt të jetë e mundur”.
Në një intervistë për Fox News të hënën, Machado falënderoi sërish Trump për “veprimet historike që ka ndërmarrë kundër regjimit narco-terrorist”. Ajo e cilësoi 3 janarin, ditën kur SHBA arrestoi Presidentin Nicolás Maduro, si një moment historik kur “drejtësia mundi tiraninë”.
Megjithatë, Trump ka deklaruar më parë se Machado “nuk ka mbështetje dhe respekt të brendshëm” për të udhëhequr Venezuelën dhe ka theksuar se Shtetet e Bashkuara po udhëheqin situatën në vend.
Edhe këshilltari i lartë i Shtëpisë së Bardhë, Stephen Miller, ka mohuar idetë për ta vendosur Machado në pushtet, duke argumentuar se ushtria venezueliane nuk do ta pranojë atë si udhëheqëse legjitime.
SHBA-ja po punon në vend të kësaj me Delcy Rodríguez, aleate e Maduros dhe presidente në detyrë, e cila ka premtuar të bashkëpunojë.
Machado, e cila ndodhet nën një ndalim udhëtimi për rreth dhjetë vjet, ishte fshehur për më shumë se një vit, por udhëtoi në Oslo, Norvegji, në dhjetor për të pranuar Çmimin Nobel për Paqen. Ajo e dedikoi çmimin Trumpit dhe theksoi se do të donte ta falënderonte personalisht për arrestimin e Maduros, duke shtuar se kishte folur për herë të fundit me të më 10 tetor, kur u njoftua për fitoren e Nobelit.
