Lidhja Demokratike e Kosovës ka mirëpritur vendimin e Gjykatës Kushtetuese që shpalli antikushtetuese përpjekjet për të futur procedura të votimit të fshehtë në seancën konstituive të Kuvendit. Gjykata ka sqaruar se zgjedhja e Kryetarit dhe Nënkryetarëve duhet të bëhet vetëm me votim të hapur, në përputhje me Kushtetutën dhe Rregulloren e Punës.
Sipas LDK-së, ky vendim përbën fitore për demokracinë dhe ligjshmërinë në vend, siç thonë “duke konfirmuar qëndrimin e saj se veprimet e Kryesuesit të Kuvendit dhe të Lëvizjes Vetëvendosje kishin synuar bllokimin e institucioneve”.
Në reagimin e saj, LDK-ja e ka cilësuar rendin kushtetues si të paprekshëm dhe mbi çdo vullnet politik.
LDK ka bërë thirrje që të gjitha forcat politike ta zbatojnë plotësisht vendimin e Gjykatës dhe që Kuvendi të vijojë menjëherë me zgjedhjen e udhëheqjes me votim të hapur. Partia ka theksuar se do të qëndrojë e përkushtuar në mbrojtjen e ligjshmërisë dhe demokracisë në Kosovë.
Komunikata:
Lidhja Demokratike e Kosovës mirëpret vendimin e sotëm të Gjykatës Kushtetuese të Republikës së Kosovës, e cila konstatoi antikushtetutshmërinë e përpjekjeve për të imponuar procedura të votimit të fshehtë gjatë seancës konstituive të Kuvendit.
Me këtë aktgjykim, Gjykata riafirmoi se kryesuesi i seancës konstituive nuk mund të veprojë jashtë përcaktimeve të qarta kushtetuese dhe nuk mund të shpikë procedura që minojnë rendin demokratik dhe ligjshmërinë. Gjykata sqaroi sërish se zgjedhja e Kryetarit dhe Nënkryetarëve të Kuvendit duhet të zhvillohet rreptësishtë sipas Kushtetutës dhe Rregullores së Punës – përmes votimit të hapur, deri në tre herë përpjekje për një kandidat, dhe brenda afatit kushtetues 30 ditor.
Ky vendim paraqet një fitore të madhe për demokracinë, ligjshmërinë dhe integritetin e institucioneve tona. Ai vërteton qëndrimin e LDK-së, e cila që nga fillimi ka insistuar se veprimet e Kryesuesit të Kuvendit dhe Lëvizjes Vetëvendosje! përbënin shkelje flagrante të Kushtetutës dhe tentim për të bllokuar funksionimin e institucioneve.
LDK ka mbrojtur gjithmonë parimin se rendi kushtetues është i paprekshëm. Asnjë vullnet politik nuk mund të qëndrojë mbi supremacinë e Kushtetutës.
Vendimi i sotëm i Gjykatës është jo vetëm fitore e LDK-së, por fitore e Republikës së Kosovës dhe e të gjithë qytetarëve që duan institucione funksionale, të ngritura mbi ligjshmëri, transparencë dhe norma demokratike.
Ne u bëjmë thirrje të gjitha forcave politike që ta respektojnë në tërësi këtë aktgjykim. Kuvendi duhet të vazhdojë menjëherë, në përputhje me Kushtetutën, me zgjedhjen e udhëheqjes së tij përmes votimit të hapur. Çdo pengesë e mëtejshme do të ishte jo vetëm antikushtetuese, por edhe akt i papërgjegjshëm ndaj qytetarëve dhe vullnetit të tyre demokratik.
LDK do të mbetet e vendosur në rolin e saj si mbrojtëse e ligjshmërisë, demokracisë dhe vlerave euro-atlantike. Republika e Kosovës meriton institucione të forta, të lindura nga Kushtetuta dhe që i shërbejnë vetëm qytetarëve.
